黃偉文專欄:最愛 Drunk Shopping - 明周文化

黃偉文專欄:最愛 Drunk Shopping

撰文: 黃偉文

25 Aug 2018

自從試過drunk shopping,便愛上這項活動,覺得世間上至為relax的娛樂,就算亂買了完全唔記得咗,第日摷返出來亦至少得啖笑!

我第一次drunk shopping時為2000年,執行李時才發現多了幾件陌生的衣服。

會請客飲靚酒的shop,通常見你有誠意試吓衫店員便會問你想飲乜,茶水咖啡汽水之外,通常有香檳。

如果我說:「『後悔』是購物樂趣的一部分,而且是主要的調味部分!」然後居然斗膽到把這句話放上網,那麼引來一大輪吱吱喳喳也是攞嚟賤唔抵爭吧。

就算咁好彩不被扣上罪無可恕的「炫富曬命」,必須強烈譴責的「教壞細路」都一定打唔甩。

只有真正被上天選中的純種「購物狂」,才會聽到後淡淡定定,在繼續碌卡前互相交換一個會心微笑。

人生已有一億件不能有半微米行差踏錯否則永不超生的事,如果連shopping都要「全部買啱」,拚命賺錢還有何意義?不如回到共產世界衣食住行結婚上網和投票都等「阿公分配」吧!

而各種「買完必後悔」的shopping活動之中,個人心水,首選drunk shopping!

Drink don’t buy?

If you drink, don’t drive. But you can drink, and buy buy buy!

可以飲咗先去買亦得,但我當然更prefer去到現場乾店家的杯。

好吧,有人又會暫亂歌柄,「唓,你出出入入啲名牌名店,梗係有香檳serve啦,我邊有你咁暴發喎!」咁首先,通常確係名牌門市或著名multi-brand store才比較濶佬請客飲靚酒(其實亦唔會話真係好靚嘅酒),羊毛和羊的問題大家都明,Uniqlo無限續杯Dom Perignon嗰日仲有無可能39蚊件短袖Tee先?但另一方面,會令客人「不醉無歸」的shop亦不見得會小心翼翼到等你開咗張五位數以上嘅單才叫阿嬸嬸捧兩隻酒杯出嚟,通常你有誠意試吓衫店員便會問你想飲乜,茶水咖啡汽水之外,又通常會有香檳揀咁解,飲完只買對三嚿水嘅襪甚至唔買嘢,杯嘢亦唔會突然間計返錢「盛惠一百二十八蚊吖先生」,所以你要是來意不善全心想佔人便宜”drunk shoping without actually spending a dime”的話你肯定做得到……如果你又真係做得出的話。但那邊廂若果真的接受了人家酒精款待而沒有揀中太多心頭好,也不必太心虛薄皮,因為人家供奉雄黃酒,當然也是套大方得體的陰謀,就是想你即場現出瘋狂購物的白蛇原形,drunk shopping亂買多幾個零!

所以請別說什麼「drunk shopping只是你們這些 『有錢人』的遊戲」之類的話,drunk shopping其實是種玩法,是種精神而已,有骨氣的經濟型,自隊兩罐喜力先入惠康失控掃貨,返屋企醒返先見到唔知點解買咗嘅「偉喜牌防牙石貓小食去毛球超量裝」一樣能博得自己一下笑騎騎吧!

又有人問會不會「醉買」一輪後,買了粒三千萬嘅紅寶石從此一生孭債闔府手尾長?首先,一般人來說,酒醉真係有三分醒吧,就算真係咁勁俾你飲到斷咗片仲識碌卡,頂多是小懲小誡小肉痛的三幾萬,還得好辛苦的人大概也從此汲取教訓,證明drunk shopping對你是重創多於搞笑,即刻戒掉。真的不用擔心你會因為一次貓咗而傾家蕩產改變命運,因為你飲醉前買不起的東西,飲醉後其實都都不可能突然碌到卡的,就算拿了那張以前電視廣告宣傳可以隨時碌架私人飛機的「無上限」信用卡,信我,他們暗盤還是有上限的,而且上限沒你想像的高,而且銀行還得看你以往的使用紀錄來approve的,你平時還開二三萬一個月的,根本不可能突然俾你碌一球嘢,再加上防止盜用的機制嚴謹,碌大的咁多都即刻有人call你啦,俾電話那邊的人問完一輪仲唔醒咩?

所以drunk shopping 的危險算是有限的,如果還怪我鼓吹不良思想,好吧,你當我現在同大家分享自己過往的「醉買」恐怖經驗,藉此希望讀者們切勿有樣學樣!

醉客之意不在shop

離開米蘭回港那朝,執行李時才發現個篋唔夠大,因為行李中突然多了幾件陌生人的麂皮褸和西裝,我一面在嘀咕這家酒店怎麼會這樣,把其他客人買的衣服錯送到我房間,另一方面在取笑物主的品味也真的十分抱歉,這種裁剪這種質料這種款式這種配搭世界上大概只有X哥才會買單吧?

說時遲那時快,身邊有把理智聲音說:「你買咕喎,你噚日食完晏飲大兩杯屎水,突然話要入XYZ行吓,我仲話are you sure ? 你平時唔吼咕呢個牌子嗰喎,結果你㩒都㩒唔住一支箭咁衝咗入去,試完件件仲都話靚!」

「咁醉?但係呢度件件都係46嚟喎,我著52㗎嘛!點會係我買嘅唧?」我話。

「咪就係咁先恐怖囉!你話你自己下個月一定瘦到20磅喎,所以買定等自己到時有得著喎!」

這是我第一次drunk shopping,時為2000年,自此愛上這項活動,覺得是世間上至為relax的娛樂,就算亂買了完全唔記得咗,第日摷返出來亦至少得啖笑!(說起來同一天我還在Milan逛街時不小心撞到某大明星的爆炸性真面目,但我現在老了更克己了就不go into details了,在街上碰見問我也沒話可講啦。)

還有,近年更喜歡drunk shopping的另一原因是,這是一樣肯定是真人在實體店做比online完成更好玩的事。也算是某種鼓勵人與人之間接觸的「古方」生活樂趣吧!

我連我下一本書的名字都想好了,叫《飲光人家的香檳》,基本上真是我40歲後的人生目標,不止有酒今朝醉,還要是人家的名貴bubbly ! 雖然書不知關於什麼及何時寫成會不會寫成,但先立此存照,你們不要抄我!哈哈哈!

熱門文章

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部